Saturday, November 21, 2026
Home Blog

म्हसोबावाडीत श्री यशवंतराय यात्रा शांततेत व उत्साहात संपन्न; पोलीस प्रशासन आणि कमिटीच्या निर्णयाला भाविकांचा उत्स्फूर्त प्रतिसाद

0

भिगवण पोलिसांनी केलेल्या आवाहनाला ग्रामस्थ आणि भाविक यांचा प्रतिसाद ; परंपरेने चालत आलेल्या अनिष्ठ प्रथेला पहिल्यांदा दिली बगल

​भिगवण (वार्ताहर) : दि. 13

इंदापूर तालुक्यातील म्हसोबावाडी येथील जागृत देवस्थान श्री यशवंतराय यांची वार्षिक यात्रा अत्यंत भक्तीमय, शांततापूर्ण आणि शिस्तबद्ध वातावरणात पार पडली. भाविकांच्या सुरक्षिततेला प्राधान्य देत यंदाच्या यात्रेपासून ‘जमिनीवर झोपून पालखी अंगावरून नेण्याची’ प्रथा कायमस्वरूपी बंद करण्याचा ऐतिहासिक निर्णय भिगवण पोलीस प्रशासन आणि यात्रा कमिटीने घेतला होता. या निर्णयाची प्रभावी अंमलबजावणी होत यात्रा कोणत्याही अनुचित प्रकाराविना यशस्वीरीत्या संपन्न झाली.
​यात्रेच्या पार्श्वभूमीवर भिगवण पोलीस ठाण्याचे सहाय्यक पोलीस निरीक्षक सोमनाथ शेंडगे यांच्या अध्यक्षतेखाली यात्रा कमिटी आणि ग्रामस्थांची नियोजन बैठक पार पडली होती. या बैठकीत पालखी, ढोल आणि सासनकाठ्या मंदिरात प्रवेश करताना प्रवेशद्वाराजवळ जमिनीवर झोपून पालखी अंगावरून नेण्याच्या प्रथेमुळे होणारा संभाव्य धोका लक्षात घेऊन ही प्रथा बंद करण्याचा सर्वानुमते निर्णय घेण्यात आला होता.
​यात्रेदरम्यान या निर्णयाचे सर्व भाविक आणि ग्रामस्थांनी काटेकोरपणे पालन केले. मंदिर प्रवेशद्वाराजवळ कोणतीही अनावश्यक गर्दी किंवा धोकादायक प्रकार न होता, पालखी आणि सासनकाठ्यांचे स्वागत अत्यंत शिस्तीत पार पडले. “श्रद्धा जपताना स्वतःचा आणि इतरांचा जीव धोक्यात घालू नये,” या पोलीस प्रशासन व यात्रा कमिटीच्या आवाहनाला भाविकांनी सकारात्मक प्रतिसाद दिला.
​यात्रा यशस्वी करण्यासाठी सहाय्यक पोलीस निरीक्षक सोमनाथ शेंडगे यांच्या मार्गदर्शनाखाली भिगवण पोलिसांनी चोख बंदोबस्त ठेवला होता. या नियोजनात बिट अंमलदार सचिन भस्मे, पोलीस पाटील तुषार झेंडे, तंटामुक्त अध्यक्ष साळुंखे, मोहिते, सरपंच राजेंद्र राऊत उपसरपंच रमेश चांदगुडे, आण्णा चांदगुडे, संदिप चांदगुडे यांच्यासह यात्रा कमिटीचे पदाधिकारी, ग्रामस्थ आणि स्वयंसेवकांनी मोलाचे सहकार्य केले. सुरक्षित आणि शांततामय वातावरणात यात्रा पार पडल्याने सर्वच स्तरांतून समाधान व्यक्त केले जात आहे.

धक्कादायक! सेवा संपलेल्या अधिकाऱ्यानेच प्राथमिक आरोग्य केंद्राच्या औषधांवर डल्ला मारल्याचा संशय ; ग्रामस्थांची थेट जिल्हा आरोग्य अधिकारी यांच्याकडे तक्रार

0

​भिगवण (वार्ताहर):दि. 6

इंदापूर तालुक्यातील शेटफळ (गडे) येथील प्राथमिक आरोग्य केंद्रातून एक अत्यंत संतापजनक आणि धक्कादायक प्रकार उजेडात आला आहे. रुग्णांसाठी शासनाकडून मोफत पुरवठा करण्यात येणारा औषधसाठा रात्रीच्या वेळी लांबवण्यात आल्याची घटना उघडकीस आली असून, यामुळे संपूर्ण आरोग्य वर्तुळात आणि परिसरात खळबळ उडाली आहे.

विशेष म्हणजे, या चोरीत सेवा समाप्ती झालेल्या एका माजी कंत्राटी आरोग्य अधिकाऱ्याचाच हात असल्याचे सीसीटीव्ही फुटेजमधून दिसून आल्याचा ग्रामस्थांचा आरोप आहे .मात्र या प्रकरणी चौकशी सुरु असल्यामुळे चौकशी अंती या प्रकरणी दोषी असणार्यांचे नाव समोर येणार आहे.

​सीसीटीव्ही फुटेजमुळे फुटले बिंग

​शेटफळ प्राथमिक आरोग्य केंद्रातून शासकीय औषधसाठ्याची परस्पर विल्हेवाट लावली जात असल्याचा संशय स्थानिक ग्रामस्थ व पदाधिकाऱ्यांना आला होता. यानंतर त्यांनी सतर्कता दाखवत आरोग्य केंद्रातील सीसीटीव्ही (CCTV) फुटेजची कसून पाहणी केली. या चित्रीकरणात, आधीच सेवा समाप्ती झालेल्या एका माजी कंत्राटी आरोग्य अधिकाऱ्याकडून रात्रीच्या सुमारास अंधाराचा फायदा घेऊन औषधे व इतर वैद्यकीय साहित्याची पळवापळवी केली जात असल्याचा आरोप ग्रामस्थ करीत आहेत.ग्रामस्थांनी हे सर्व फुटेज सार्वजनिक करत प्रशासनाचा पर्दाफाश केला आहे.

​ग्रामस्थांमध्ये तीव्र संताप ;
पोलीस ठाण्यात अद्याप तक्रार नाही

​शासकीय रुग्णालयातील गोरगरीब रुग्णांच्या औषधांची अशा प्रकारे चोरी झाल्यामुळे ग्रामस्थांमधून आणि नागरिकांमधून तीव्र संताप व्यक्त होत आहे. घटनेची गंभीर दखल घेत शेटफळगडे गावातील नागरिक व लोकप्रतिनिधींनी तातडीने जिल्हा आरोग्य अधिकाऱ्यांशी संपर्क साधून याप्रकरणी सखोल चौकशी व कठोर कायदेशीर कारवाईची मागणी केली आहे. मात्र, वृत्त लिहिपर्यंत या प्रकरणी संबंधित पोलीस ठाण्यात कोणतीही अधिकृत फौजदारी तक्रार दाखल करण्यात आली नसल्याची माहिती समोर येत आहे.

​प्रशासन काय म्हणाले?

​”संबंधित कंत्राटी आरोग्य अधिकाऱ्याला ही घटना घडण्यापूर्वीच सेवेतून निलंबित करण्यात आले होते. या प्रकरणाची चौकशी करण्यासाठी एक समिती नेमण्यात आली असून, समितीचा अहवाल हाती आल्यानंतर संबंधितावर तात्काळ कठोर फौजदारी कारवाई केली जाईल.”
— डॉ. रामचंद्र हंकारे, जिल्हा आरोग्य अधिकारी

​”या गंभीर प्रकाराची माहिती मला मिळाली असून, या प्रकरणाची चौकशी करण्यासाठी समिती नेमण्यात आली आहे. चौकशीचा अहवाल प्राप्त झाल्यानंतर यात कोणतीही कसूर न ठेवता योग्य ती कडक कायदेशीर कारवाई केली जाईल.”
— मेघनाताई बंडगर, जिल्हा परिषद सदस्य

0

वालचंदनगर पोलिसांची धडाकेबाज कामगिरी! खंडणीखोर पत्रकार सुंदर कुसाळकरला बेड्या; भुरट्या पत्रकारितेचा बुरखा टरकावला

भिगवण वार्ताहर. दि. 29


भिगवण पोलीस स्टेशनं येथे 2023 मधील खंडणी गुन्हा दाखल असलेल्या कथित पत्रकार असणाऱ्या आरोपीला वालचंदनगर पोलिसांनी सिनेमा स्टाईल सापळा रचून अटक केली.

सुंदर दगडू कुसाळकर रा. कृष्णकुंज सोसायटी भिगवण असे अटक करण्यात आलेल्या कथित पत्रकाराचे नाव असून 2023 साली या आरोपी विरोधात गुन्ह्यांची नोंद आहे.
याबाबत सविस्तर माहिती प्रमाणे भिगवण बाजारपेठेतील सरांफी व्यावसायिक असणाऱ्या फिर्यादी सुरेश पिसाळ यांच्या मुला विरोधात खोट्या आणि गंभीर गुन्ह्यांची धमकी देत कुसाळकर याने 6 लाख रुपयाची खंडणी घेतली होती.
तर खंडणी मिळाल्या नंतर खुनशी प्रवृत्ती बाळगून हद्दीबाहेरील पोलीस ठाण्यात जाऊन फिर्यादी यांच्या मुला विरोधात गुन्हा नोंद केली. खंडणीचा गुन्हा भिगवण येथे नोंद होऊनही आरोपी आणि फिर्यादी मीडिया मध्ये काम करीत असल्याने तत्कालीन पुणे ग्रामीण पोलीस अधीक्षक यांनी या गुन्ह्याचा तपास वालचंद पोलीस ठाण्यात तपासासाठी वर्ग करण्यात आला होता. 33 महिने पत्रकारितेचा रुबाब दाखवीत आणि रात्रीच्या वेळी खंडणी हप्ते मिळणाऱ्या भक्षाच्या शोधात बाहेर पडणाऱ्या तथाकथित पत्रकाराला पकडणे हे पुणे ग्रामीण पोलिसांना आव्हान होते. मात्र या आव्हानाचा वालचंदनगर पोलिसांनी सामना करीत इंदापूर कोर्ट परिसरात सापळा रचित या सोकॉल पत्रकारांच्या मुसक्या आवळल्या. 27 तारखेला अटक करीत 28 तारखेला मेहेरबान न्यायालयात हजर केले असता त्याला मेहेरबान कोर्टाने 29 तसेच 30 अशी दोन दिवसाची पोलीस कस्टडी सुनावली.


सदर अटकेची कारवाई पुणे ग्रामीण पोलीस अधीक्षक संदीप गिल्ल, अप्पर पोलीस अधीक्षक गणेश बिरादार, बारामती उपविभागीय पोलीस अधिकारी चैत्यन्य कदम यांच्या मार्गदर्शना खाली वालचंदनगर पोलीस ठाण्याचे प्रभारी अधिकारी गोपाळ पवार, राईटर अधिकारी अभिजित कळसकर, पोलीस सतीश चव्हाण या पथकाने केली.

इंदापूर तालुक्यातील म्हसोबाचीवाडी येथून ३० वर्षीय विवाहिता बेपत्ता; अपहरणाचा गुन्हा दाखल, पोलिसांचे तपासाचे आवाहन

0

​भिगवण वार्ताहर. दि. 23

इंदापूर तालुक्यातील म्हसोबाचीवाडी येथून एक ३० वर्षीय महिला बेपत्ता झाली असून, तिच्या अपहरणा बाबत भिगवण पोलीस ठाण्यात गुन्हा दाखल करण्यात आला आहे. या प्रकरणी पोलीस अधिक तपास करत आहेत.

​मिळालेल्या माहितीनुसार सारिका ज्योतीराम वाघ वय 30 म्हसोबाचीवाडी असे अपहरण झालेल्या विवाहित महिलेचे नाव आहे. पती ज्योतीराम यांनी दिलेल्या तक्रारीवरून हा गुन्हा नोंदवण्यात आला आहे. त्यांची पत्नी सारिका वय 30 ही दिनांक १६ सप्टेंबर २०२६ रोजी पहाटे ५:०० वाजेच्या सुमारास ‘ड्रीम प्लास्ट, एमआयडीसी बारामती’ येथे कामाला जाते असे सांगून घरातून निघाली होती. परंतु, ती अद्याप घरी परत आलेली नाही. कोणीतरी अज्ञात इसमाने अज्ञात कारणासाठी तिचे अपहरण केले असावे, असा संशय तक्रारीत व्यक्त करण्यात आला आहे.


​या प्रकरणी भिगवण पोलीस ठाण्यात गुन्हा रजि. नंबर २३२/२०२६, भारतीय न्याय संहिता कलम १४०(३) अन्वये गुन्हा दाखल करण्यात आला आहे.
अपहृत महिलेचे वर्णन सारिका ज्योतीराम वाघ३० वर्षे सडपातळरंग काळा-सावळा आहे.
​सदर महिलेबाबत काही माहिती मिळाल्यास किंवा ती दिसून आल्यास भिगवण पोलीस स्टेशन (दूरध्वनी: ०२११८-२४६२३३) किंवा संबंधित तपास अधिकारी सचिन भस्मे मो. 9881387487, 9552164100
यांच्याशी संपर्क साधण्याचे आवाहन पोलिसांकडून करण्यात आले आहे.

भिगवणमध्ये खळबळ: प्रसिद्ध कापड व्यावसायिकाच्या पत्नीची आत्महत्या; घरगुती वाद,खासगी सावकारी की भिशीचा ताण? डायरीमुळे गूढ उकलणार?

0

​भिगवण वार्ताहर. दि. 22
भिगवण बाजारपेठेतील एका नामांकित आणि प्रसिद्ध कापड व्यावसायिकाच्या पत्नीने अचानक टोकाचे पाऊल उचलत आत्महत्या केल्याची धक्कादायक घटना उघडकीस आली आहे. या दुर्दैवी घटनेमुळे संपूर्ण भिगवण बाजारपेठ आणि परिसरात प्रचंड खळबळ उडाली असून नागरिकांमधून हळहळ व्यक्त केली जात आहे.

​मिळालेल्या प्राथमिक माहितीनुसार प्रियांका संदीप गुंदेचा वय 39 रा. ताराई आनंद थोरात नगर हे आत्महत्या केलेल्या व्यावसायिक पत्नीचे नाव आहे. प्रियांका यांनी थोरात नगर येथील राहत्या घरी पंख्याला गळफास लावून आत्महत्या केली. या आत्महत्या करण्यामागचे अचूक कारण अजूनही अस्पष्ट आहे. मात्र, ही आत्महत्या खासगी सावकारी आणि भिशी व्यावसायिकांच्या तगाद्यामुळे झाली की यामागे काही कौटुंबिक वा घरगुती कारण आहे, या दोन्ही शक्यता विचारात घेऊन भिगवण पोलीस सध्या सर्व बाजूंनी सखोल तपास करत आहेत.
​घटनेची माहिती मिळताच भिगवण पोलिसांनी तातडीने घटनास्थळी धाव घेऊन पंचनामा केला आणि या प्रकरणी पती संदीप गुंदेचा यांनी खबर दिली असून प्राथमिक स्तरावर आकस्मिक मृत्यूची नोंद केली आहे.

​घटनास्थळी सापडली डायरी!

दरम्यान, पोलिसांना घटनास्थळावरून एक डायरीसारखी वस्तू हस्तगत झाल्याची चर्चा दिवसभर भिगवण बाजारपेठेत सुरू होती. या डायरीमध्ये आत्महत्येमागील नेमके कारण किंवा काही महत्त्वाच्या नोंदी असू शकतात, असा अंदाज वर्तवला जात आहे. या डायरीची बारकाईने तपासणी करत असून, यावरून तपासाला नवी दिशा मिळण्याची शक्यता आहे.
​पोलीस प्रशासनाकडून सध्या आकस्मित मृत्यू या प्राथमिक दिशेने तपास सुरू असून, तपासाअंती आणि महत्त्वाचे पुरावे हाती आल्यानंतर माहिती समोर येईल, अशी माहिती चर्चेतून मिळत आहे. एका प्रसिद्ध व्यापाऱ्याच्या कुटुंबातील या घटनेमुळे भिगवण परिसरात शोककळा पसरली आहे.

सरदार वल्लभभाई पटेल जयंतीनिमित्त आयोजित ‘राष्ट्रीय एकता रॅली’चे भिगवण येथे होणार स्वागत; भिगवण पोलिसांचे नागरिकांना उपस्थित राहण्याचे आवाहन

0

भिगवण (विशेष प्रतिनिधी):

सरदार वल्लभभाई पटेल यांच्या १५१ व्या जयंतीनिमित्त येत्या ३१ ऑक्टोबर २०२६ रोजी गुजरात येथील स्टॅच्यु ऑफ युनिटी (केवडिया) येथे ‘राष्ट्रीय एकता परेड’चे भव्य आयोजन करण्यात आले आहे. या ऐतिहासिक सोहळ्यानिमित्त आंध्र प्रदेश, तमिळनाडू, तेलंगणा, पुडुचेरी आणि अंदमान-निकोबार येथील पोलीस अधिकारी व अंमलदारांच्या वतीने एक विशेष प्रोत्साहन रॅली काढण्यात येत आहे.

​या राष्ट्रीय एकता रॅलीचे भिगवण शहरात दसरा सणा दिवशी औचित्यपूर्ण स्वागत करण्यात येणार असून, भिगवण पोलीस ठाण्याचे सहाय्यक पोलीस निरीक्षक सोमनाथ शेंडगे यांच्या वतीने विविध सामाजिक, राजकीय व शैक्षणिक संस्थांना एकत्र येऊन या रॅलीचे जंगी स्वागत व त्यांना प्रोत्साहन देण्याचे आवाहन करण्यात आले आहे.

ही रॅली दिनांक २० ऑक्टोबर २०२६ रोजी दुपारी २:३० वाजण्याच्या सुमारास भिगवण शहरात आगमन करणार आहे. सोलापूर लेन नजीक असलेल्या हॉटेल सागर समोरील मोकळ्या प्रांगणात स्वागत सोहळ्याचे आयोजन करण्यात आले आहे.

​विविध संघटनांना पोलिसांचे निमंत्रण:

या प्रसंगी रोटरी क्लब ऑफ भिगवण, नेचरस् फाउंडेशन / सायकल क्लब, भिगवण मेडिको असोसिएशन, पत्रकार संघ भिगवण, परिसरातील सर्व धार्मिक व राजकीय संघटना तसेच सर्व अकॅडमीच्या पदाधिकारी व सदस्यांनी मोठ्या संख्येने उपस्थित राहून या रॅलीचे स्वागत करावे, अशी विनंती पोलीस प्रशासनाकडून करण्यात आली आहे.
​

पद्मावती देवीच्या पहाटेच्या पायी वारीत महिलांच्या सुरक्षिततेसाठी पोलिसांची धाव; एपीआय सोमनाथ शेंडगे यांनी स्वतः चालत केली सुरक्षा सुनिश्चित

0

भिगवण वार्ताहर.दि. 17

पिंपळे (इंदापूर )येथील पद्मावती देवीच्या दर्शनासाठी निघणाऱ्या पहाटेच्या पायी वारीत महिला सुरक्षेचा एक उत्तम आदर्श पाहायला मिळाला आहे. पहाटेच्या अंधारात कोणतीही अनुचित घटना घडू नये आणि महिला भाविकांना सुरक्षित वातावरण लाभावे,भिगवण पोलीस स्टेशनचे सहायक पोलीस निरीक्षक (API) सोमनाथ शेंडगे यांनी स्वतः पहाटेपासून पायी चालत महिलांच्या सुरक्षिततेची संपूर्ण काळजी घेतली.

भाविक महिला आणि ​स्थानिक परंपरेनुसार, पिंपळे येथील पद्मावती देवीला दर्शनासाठी पहाटे पायी चालत जाण्याला पसंती देतात . घट स्थापना झालेल्या पहिल्या दिवसा पासूनच देवीच्या दर्शनाला अनवाणी पायाने चालत जाणाऱ्या महिला आणि पुरुष दिवस उगाविण्याच्या आत देवीचे दर्शन घेतात. तक्रारवाडी, भिगवण, मदनवाडी, पोंधवडी, डिकसळ तसेच भिगवण रेल्वे स्टेशन येथील अनेक भाविक बारामती भिगवण राज्य मार्गांवरून देवीच्या दर्शनासाठी येत असतात.पहाटेची वेळ आणि अंधार असल्यामुळे महिलांच्या सुरक्षेचा प्रश्न निर्माण होऊ नये, याची दक्षता पोलीस प्रशासनाने घेतली.


​पोलिसांचा संवेदनशील आणि आश्वासक सहभाग


​कोणताही बंदोबस्त केवळ कागदावर किंवा वाहनापुरता मर्यादित न ठेवता, एपीआय सोमनाथ शेंडगे यांनी स्वतः महिलांच्या सोबतीने पायी चालण्याचा निर्णय घेतला. पहाटेच्या अंधारात आणि भक्तिमय असणाऱ्या वातावरणात पोलीस अधिकारी आपल्यासोबत पायी चालत आहेत, हे पाहून महिला भाविकांमध्ये एक वेगळाच आत्मविश्वास आणि सुरक्षिततेची भावना निर्माण झाली. तसेच शासकीय वाहनातून सायरन आणि दिवा लावून पोलीस मंदिर परिसरात तसेच मदनवाडी घाटात बंदोबस्त करताना आढळून आले.पोलिसांच्या या जनहितैषी व संवेदनशील भूमिकेचे सर्वच स्तरातून जोरदार स्वागत होत आहे.

​नागरिकांकडून पोलिसांचे कौतुक

​पोलीस प्रशासनाच्या या तळागाळातील आणि आपुलकीच्या सहभागामुळे सर्वसामान्यांचा पोलिसांवरील विश्वास आणखी दृढ झाला आहे. “पोलीस हे केवळ सुरक्षेसाठीच नाही, तर जनतेच्या सुख-दुःखात आणि धार्मिक-सांस्कृतिक परंपरांमध्येही खंबीरपणे पाठीशी उभे असतात,” अशी प्रतिक्रिया यावेळी उपस्थित नागरिकांनी व्यक्त केली. या कौतुकास्पद कामगिरीबद्दल एपीआय सोमनाथ शेंडगे आणि त्यांच्या संपूर्ण पोलीस पथकावर अभिनंदनाचा वर्षाव होत आहे.

याबाबत बोलताना शेंडगे यांनी पुणे ग्रामीण पोलीस हे नेहमीच महिला आणि मुलींच्या सुरक्षेसाठी नेहमी प्राधान्य देत असल्याचे सांगितले. तसेच सणासुदीच्या काळात आणि महिलांच्या आनंदी वातावरनात दर्शन व्हावे म्हणुन भिगवण पोलिसांनी हा उपक्रम राबवीला जात असल्याचे सांगितले.

भिगवण पोलिसांची ‘बुलेट’ स्पीड कारवाई! ‘हिट अँड रन’ प्रकरणात वाहन जप्त करीत चालकाला ठोकल्या बेड्या; सपोनि सोमनाथ शेंडगे यांचा नेचर डेअरीकडून नागरी सत्कार

0

अपघातातील मृत साहिल भोसले नेचर डेअरीचा कामगार असल्यामुळे नेचर डेअरी व्यवस्थापन आणि कामगारांचे तपासाकडे होते विशेष लक्ष

​भिगवण वार्ताहर. दि. 20
भिगवण पोलिस स्टेशनच्या हद्दीत झालेल्या बुलेट अपघातातील ‘हिट अँड रन’ करून पळून गेलेल्या वाहनाचा तत्परतेने तपास लावून ते पकडण्यात भिगवण पोलिसांना यश आले आहे. पोलिसांच्या या कामगिरीबद्दल व तत्पर तपासाबद्दल नेचर डेअरीचे संचालक संदीपभैय्या देसाई आणि जनरल मॅनेजर डॉ. प्रशांत कदम यांच्या हस्ते भिगवण पोलिस स्टेशनचे प्रभारी अधिकारी सहाय्यक पोलिस निरीक्षक सोमनाथ शेंडगे तसेच पथकातील अधिकारी यांचा विशेष सत्कार करण्यात आला.

​घटना व पोलिसांची तत्परता:

काही दिवसांपूर्वी भिगवण परिसर हद्दीत बुलेट दुचाकीचा भीषण अपघात झाला होता. या अपघातात नेचर डेअरी चा एम्प्लॉयी असणाऱ्या साहिल भोसले याचा दुर्दैवी मृत्यू झाला होता. त्याच्या मृत्यूमुळे नेचर डेअरी या संस्थेतील कामगार तसेच कंपनी व्यवस्थापन यांच्यावर दुःखाचा प्रसंग निर्माण झाला होता.अपघात घडवल्यानंतर संबंधित अज्ञात वाहनचालक घटनास्थळावरून वाहनासह पसार झाला होता. यामुळे नेचर डेअरी चे संचालक संदीपभैया देसाई यांचे या प्रकरणी तपासाकडे विशेष लक्ष होते.
(‘हिट अँड रन’).
या गंभीर आणि आव्हानत्मक घटनेची तातडीने दखल घेत भिगवण पोलिस स्टेशनचे प्रभारी अधिकारी सोमनाथ शेंडगे यांनी तपासाची चक्रे वेगाने फिरवली. सी सी. टीव्ही फुटेज तांत्रिक विश्लेषण, गुप्त माहिती आणि परिसरातील तपासाच्या आधारे पोलिसांनी अवघ्या काही दिवसातच पळून गेलेल्या वाहनाचा शोध घेऊन ते पकडले.

​पोलिसांच्या तत्परतेचे कौतुक:

अपघातातील दोषी वाहनाचा शोध घेऊन न्याय मिळवून दिल्याबद्दल आणि कायदा-सुव्यवस्थेचा धाक निर्माण केल्याबद्दल नेचर डेअरीच्या व्यवस्थापनाने पोलिसांच्या या धडक कारवाईचे भरभरून कौतुक केले. याप्रसंगी नेचर डेअरीचे संचालक संदीपभैय्या देसाई आणि नेचर डेअरी चे जनरल मॅनेजर डॉ. प्रशांत कदम यांनी भिगवण पोलिस ठाण्यात जाऊन सोमनाथ शेंडगे यांचा पुष्पगुच्छ व सन्मानचिन्ह देऊन नागरी सत्कार केला.
​यावेळी बोलताना संदीपभैय्या देसाई यांनी सांगितले की, “अपघात करून पळून गेलेल्या वाहणाचा सर्व पैलूने तपास करून मृत व्यक्तीस न्याय देण्याच्या भूमिका आणि पोलिसांनी दाखवलेली तत्परता कौतुकास्पद आहे. यामुळे नागरिकांचा महाराष्ट्र पोलिसांवरील विश्वास अधिक दृढ होतो.”

​सत्काराला उत्तर देताना प्रभारी अधिकारी सोमनाथ शेंडगे यांनी सांगितले की, “नागरिकांच्या सुरक्षिततेसाठी पुणे ग्रामीण पोलिस नेहमीच कटिबद्ध आहेत. नागरिकांनी दिलेल्या या स्नेहामुळे आणि कौतुकामुळे कामाची ऊर्जा अधिक वाढते.”

भिगवण पोलिसांची दमदार कामगिरी ; बुलेट स्वाराच्या अपघातास कारणीभूत चालक कार सह घेतला ताब्यात.

0

रात्रीचा अपघात करून पसार झालेले वाहन सापडतच नाही असा समज खोडून काढत पोलिसांनी ठेवला वेगळाच आदर्श

भिगवण (विशेष प्रतिनिधी):

बारामती-भिगवण रस्त्यावर अपघात करून दुचाकीस्वाराच्या मृत्यूस कारणीभूत ठरलेल्या आणि घटनास्थळावरून पसार झालेल्या अज्ञात चारचाकी चालकाचा भिगवण पोलिसांनी केवळ ६ दिवसांत शोध लावून गुन्हा उघडकीस आणला आहे. या धडक कारवाईमुळे नागरिकांमधून पोलिसांचे विशेष कौतुक केले जात आहे.

​नेमकी घटना काय?

​१३ सप्टेंबर २०२६ रोजी रात्री ७:३० वाजण्याच्या सुमारास मौजे शेटफळगढे (ता. इंदापूर) हद्दीत कोठारी फार्मजवळ हा भीषण अपघात घडला होता. साहिल प्रवीण भोसले (वय २५, रा. उद्वट, ता. इंदापूर) हा तरुण आपल्या बुलेटवरून (क्र. MH 42 BT 0007) बारामतीकडून भिगवणकडे जात असताना भरधाव वेगातील एका अज्ञात वाहनाने त्याच्या गाडीला जोरदार धडक दिली. या अपघातात गंभीर दुखापत झाल्याने साहिलचा दुर्दैवी मृत्यू झाला. अपघात घडल्यानंतर चालक अपघाताची कोणतीही माहिती न देता वाहनासह पळून गेला होता.

काही वर्षांपूर्वी दुचाकी ​अपघातातच आई-वडिलांचे छत्र हरपलेल्या तरुण साहिलचा या अपघातात मृत्यू झाल्याने इंदापूर-बारामती परिसरात प्रचंड हळहळ आणि संताप व्यक्त केला जात होता. ‘अपघात करून पळून गेल्यास वाहन सापडत नाही’ असा समज पसरल्याने समाजात तीव्र रोष निर्माण झाला होता.

​पोलिसांसमोर तपासाचे मोठे आव्हान

​या घटनेचे गांभीर्य ओळखून भिगवण पोलीस ठाण्याचे प्रभारी अधिकारी, सहाय्यक पोलीस निरीक्षक सोमनाथ शेंडगे यांनी तात्काळ विशेष तपास पथक तैनात केले. ग्रामीण भाग आणि रात्रीची वेळ असल्याने परिसरातील सीसीटीव्ही (CCTV) फुटेज अत्यंत अस्पष्ट दिसत होते. त्यामुळे अज्ञात वाहनाचा शोध घेणे हे पोलिसांसमोर मोठे आव्हान बनले होते.
​अशी झाली कारवाई
​तपास पथकाने अत्यंत सचोटीने, तांत्रिक माहितीच्या आधारे आणि गुप्त बातमीदारांमार्फत माहिती गोळा केली. अखेर अपघातातील चारचाकी ‘मारुती सुझुकी एस-क्रॉस’ (क्र. MH 42 AS 8123) आणि तिचा चालक विरेंद्र मनोहर सोनवणे (वय ४७, रा. मोतीबाग, गुणवडी, ता. बारामती, जि. पुणे) यांचा शोध घेण्यात पोलिसांना यश आले. पोलिसांनी चालकाला ताब्यात घेऊन विचारपूस केली असता, त्याने अपघाताची कबुली दिली.
​या प्रकरणी भिगवण पोलीस ठाण्यात भारतीय न्याय संहिता (BNS) २०२३ चे कलम १०६(१), २८१, १२५(ए), १२५(बी) आणि मोटार वाहन कायद्यानुसार गुन्हा नोंदवण्यात आला असून पुढील तपास पोलीस अंमलदार नानासाहेब सूर्यवंशी करत आहेत.

​मार्गदर्शन व तपास पथक

​ही यशस्वी कामगिरी पुणे ग्रामीणचे पोलीस अधीक्षक संदीप सिंह गिल्ल, अपर पोलीस अधीक्षक (बारामती) गणेश बिरादार, आणि उपविभागीय पोलीस अधिकारी चैतन्य कदम यांच्या मार्गदर्शनाखाली सहाय्यक पोलीस निरीक्षक सोमनाथ शेंडगे, पोलीस अंमलदार नानासाहेब सूर्यवंशी, रामदास कर्चे, सचिन पवार, योगेश कुलकर्णी, तुषार रायकर आणि दत्तात्रय गवळी यांच्या पथकाने केली.

भिगवण बारामती मार्गांवर भीषण अपघात ; अपघातात बुलेट स्वार तरुणाचा जागीच मृत्यू

0

​भिगवण (वार्ताहर), दि. 16बारामती-भिगवण राज्य मार्गावरील शेटफळ गडे गावच्या हद्दीत, कोठारी फार्मजवळ रविवारी सायंकाळी ७:३० च्या सुमारास बुलेट आणि चारचाकी वाहनादरम्यान भीषण अपघात झाला. या दुर्देवी अपघातात बुलेटस्वार तरुणाचा जागीच मृत्यू झाला.​

साहिल प्रवीण भोसले (वय २५, रा. उद्धट) असे अपघातात मृत्यू झालेल्या दुचाकीस्वाराचे नाव आहे.​मिळालेल्या माहितीनुसार, साहिल भोसले हा आपल्या ताब्यातील बुलेट गाडीवरून (क्रमांक MH 42 BT 0007) बारामतीहून भिगवणच्या दिशेने जात होता. कोठारी फार्म येथील धोकादायक वळणावर समोरून येणाऱ्या एका अज्ञात चारचाकी वाहनाने त्याच्या बुलेटला जोरदार धडक दिली. हा अपघात इतका भीषण होता की, साहिल गंभीर जखमी झाला.​अपघाताची माहिती मिळताच ‘आपुलकीची जागा रुग्णवाहिका सेवा’चे संचालक केतन वाघ यांनी तातडीने घटनास्थळी धाव घेतली. गंभीर जखमी साहिल याला उपचारासाठी भिगवण येथील ‘लाईफ लाईन आय.सी.यू.’ रुग्णालयात दाखल करण्यात आले; मात्र उपचारापूर्वीच त्याची प्राणज्योत मालवली असल्याचे डॉक्टरांनी घोषित केले.​

घटनेची माहिती मिळताच भिगवण पोलिसांनी तातडीने अपघातस्थळी भेट देऊन पाहणी केली. धडक देऊन पसार झालेल्या अज्ञात वाहनाचा व चालकाचा शोध पोलिसांनी सुरू केला आहे.

साहिल याच्या आई-वडिलांचाही अवघ्या दोन वर्षांपूर्वी पूर्वी दुचाकी अपघातात मृत्यू झाला होता. दोन वर्षाच्या काळात कुटुंबातील आधार असलेला तरुण मुलगाही अपघातात दगावल्याने भोसले कुटुंबावर दुःखाचा डोंगर कोसळला आहे. या घटनेने उद्धट, घोलपवाडी, पवारवाडी व भिगवण परिसरात अत्यंत हळहळ व्यक्त केली जात आहे.​

अपघाताची खबर सौरभ प्रदीप भोसले यांनी दिली.अपघाताचा तपास पोलीस हवालदार नानासाहेब सूर्यवंशी करीत आहेत.

भिगवण पोलीस ठाण्याचे प्रभारी अधिकारी सोमनाथ शेंडगे यांनी अज्ञात वाहनाचा तपास करण्यासाठी पथक नेमले असून लवकरच या वाहणाचा शोध घेतला जाणार असल्याची माहिती पोलीस सूत्रांनी दिली.