रात्रीचा अपघात करून पसार झालेले वाहन सापडतच नाही असा समज खोडून काढत पोलिसांनी ठेवला वेगळाच आदर्श
भिगवण (विशेष प्रतिनिधी):
बारामती-भिगवण रस्त्यावर अपघात करून दुचाकीस्वाराच्या मृत्यूस कारणीभूत ठरलेल्या आणि घटनास्थळावरून पसार झालेल्या अज्ञात चारचाकी चालकाचा भिगवण पोलिसांनी केवळ ६ दिवसांत शोध लावून गुन्हा उघडकीस आणला आहे. या धडक कारवाईमुळे नागरिकांमधून पोलिसांचे विशेष कौतुक केले जात आहे.
नेमकी घटना काय?
१३ सप्टेंबर २०२६ रोजी रात्री ७:३० वाजण्याच्या सुमारास मौजे शेटफळगढे (ता. इंदापूर) हद्दीत कोठारी फार्मजवळ हा भीषण अपघात घडला होता. साहिल प्रवीण भोसले (वय २५, रा. उद्वट, ता. इंदापूर) हा तरुण आपल्या बुलेटवरून (क्र. MH 42 BT 0007) बारामतीकडून भिगवणकडे जात असताना भरधाव वेगातील एका अज्ञात वाहनाने त्याच्या गाडीला जोरदार धडक दिली. या अपघातात गंभीर दुखापत झाल्याने साहिलचा दुर्दैवी मृत्यू झाला. अपघात घडल्यानंतर चालक अपघाताची कोणतीही माहिती न देता वाहनासह पळून गेला होता.
काही वर्षांपूर्वी दुचाकी अपघातातच आई-वडिलांचे छत्र हरपलेल्या तरुण साहिलचा या अपघातात मृत्यू झाल्याने इंदापूर-बारामती परिसरात प्रचंड हळहळ आणि संताप व्यक्त केला जात होता. ‘अपघात करून पळून गेल्यास वाहन सापडत नाही’ असा समज पसरल्याने समाजात तीव्र रोष निर्माण झाला होता.
पोलिसांसमोर तपासाचे मोठे आव्हान
या घटनेचे गांभीर्य ओळखून भिगवण पोलीस ठाण्याचे प्रभारी अधिकारी, सहाय्यक पोलीस निरीक्षक सोमनाथ शेंडगे यांनी तात्काळ विशेष तपास पथक तैनात केले. ग्रामीण भाग आणि रात्रीची वेळ असल्याने परिसरातील सीसीटीव्ही (CCTV) फुटेज अत्यंत अस्पष्ट दिसत होते. त्यामुळे अज्ञात वाहनाचा शोध घेणे हे पोलिसांसमोर मोठे आव्हान बनले होते.
अशी झाली कारवाई
तपास पथकाने अत्यंत सचोटीने, तांत्रिक माहितीच्या आधारे आणि गुप्त बातमीदारांमार्फत माहिती गोळा केली. अखेर अपघातातील चारचाकी ‘मारुती सुझुकी एस-क्रॉस’ (क्र. MH 42 AS 8123) आणि तिचा चालक विरेंद्र मनोहर सोनवणे (वय ४७, रा. मोतीबाग, गुणवडी, ता. बारामती, जि. पुणे) यांचा शोध घेण्यात पोलिसांना यश आले. पोलिसांनी चालकाला ताब्यात घेऊन विचारपूस केली असता, त्याने अपघाताची कबुली दिली.
या प्रकरणी भिगवण पोलीस ठाण्यात भारतीय न्याय संहिता (BNS) २०२३ चे कलम १०६(१), २८१, १२५(ए), १२५(बी) आणि मोटार वाहन कायद्यानुसार गुन्हा नोंदवण्यात आला असून पुढील तपास पोलीस अंमलदार नानासाहेब सूर्यवंशी करत आहेत.
मार्गदर्शन व तपास पथक
ही यशस्वी कामगिरी पुणे ग्रामीणचे पोलीस अधीक्षक संदीप सिंह गिल्ल, अपर पोलीस अधीक्षक (बारामती) गणेश बिरादार, आणि उपविभागीय पोलीस अधिकारी चैतन्य कदम यांच्या मार्गदर्शनाखाली सहाय्यक पोलीस निरीक्षक सोमनाथ शेंडगे, पोलीस अंमलदार नानासाहेब सूर्यवंशी, रामदास कर्चे, सचिन पवार, योगेश कुलकर्णी, तुषार रायकर आणि दत्तात्रय गवळी यांच्या पथकाने केली.
