भिगवण पोलीस स्टेशन येथे सराफ व्यवसायिकांची आयोजित बैठकीत प्रभारी अधिकारी शेंडगे यांनी केली सूचना.
भिगवण (वार्ताहर):दि. 22
सोन्या-चांदीचे गगनाला भिडलेले भाव आणि वाढत्या चोरीच्या घटनांच्या पार्श्वभूमीवर, भिगवण पोलिस ठाण्याचे सहाय्यक पोलिस निरीक्षक सोमनाथ शेंडगे यांनी भिगवण बाजारपेठेतील सराफ व्यावसायिक आणि सुवर्णकारांची तातडीची बैठक घेतली. भिगवण हे तीन जिल्हे आणि चार तालुक्यांचे मध्यवर्ती केंद्र असल्याने या ठिकाणी मोठी उलाढाल होते; त्यामुळे सुरक्षिततेच्या दृष्टीने व्यापाऱ्यांना महत्त्वपूर्ण सूचना देण्यात आल्या.
यावेळी बोलताना पोलीस अधिकारी शेंडगे यांनी व्यापाऱ्यांना सुरक्षेचा कानमंत्र देत दुकानांमध्ये अद्ययावत सीसीटीव्ही यंत्रणा बसवण्याचे महत्त्व पटवून दिले. तसेच, कोणत्याही ग्राहकाकडून मोडीचे (जुने) सोने-चांदी खरेदी करताना पावती आणि केवायसी (KYC) पडताळणी केल्याशिवाय खरेदी करू नये, असा स्पष्ट इशारा दिला.
बाजारपेठेतील वाढत्या वाहतूक कोंडीमुळे होणाऱ्या त्रासावर लवकरात लवकर तोडगा काढण्यासाठी गावात ‘पी-१, पी-२’ (P1-P2) पार्किंग योजना अमलात आणली जाईल, अशी माहितीही त्यांनी या प्रसंगी दिली.
केंद्रीय पुरस्कारप्राप्त अधिकाऱ्यांचा गौरव
उत्कृष्ट सेवेबद्दल मिळालेल्या केंद्रीय पुरस्काराबद्दल भिगवण सराफ संघटनेच्या वतीने सहाय्यक निरीक्षक सोमनाथ शेंडगे व सचिन पवार यांचा विशेष सत्कार करून त्यांना भावी वाटचालीस शुभेच्छा देण्यात आल्या.
या बैठकीस शिवाजी उदावंत, दत्तात्रय उदावंत , संदीप गायकवाड, दिलीप कदम, ओंकार उदावंत, संजय उदावंत, संतोष काळभोर, अतिश जगताप, गणेश उदावंत, तेजस जाचक, अजित कदम , सुरेश पाटील यांच्यासह सराफ व्यावसायिक मोठ्या संख्येने उपस्थित होते.
