भिगवण वार्ताहर. दि. 11
भिगवण पोलीस स्टेशन हद्दीतील निरगुडे परिसरात गावठी पिस्तूल बाळगून फिर्यादीस गोळ्या घालण्याची धमकी देत दहशत निर्माण करणाऱ्या आरोपीला भिगवण पोलिसांनी अत्यंत तत्परतेने अटक केली आहे. आरोपीकडून एक गावठी पिस्तूल (अग्निशस्त्र), एक जिवंत काडतूस आणि गुन्ह्यात वापरलेली स्कॉर्पिओ गाडी असा एकूण ५ लाख ४० हजार २०० रुपयांचा मुद्देमाल हस्तगत करण्यात आला आहे.
याबाबत भिगवण पोलीस ठाण्यात दाखल झालेल्या फिर्यादी नुसार दिनांक ०७/०८/२०२६ रोजी दुपारी ३:०० वाजण्याच्या सुमारास मौजे निरगुडे (ता. इंदापूर, जि. पुणे) येथील जमीन गट नंबर १३७ मध्ये आरोपी सौरभ मारूती पवार (वय २८ वर्ष, रा. म्हसोबाचीवाडी, ता. इंदापूर) याने आपल्या स्कॉर्पिओ गाडीतून येऊन फिर्यादी युवराज प्रतापराव भोसले यांना “तू येथे थांबायचे नाही, निघून जा” असे म्हणून शिवीगाळ केली. तसेच स्वतःजवळील गावठी पिस्तूल दाखवून “तुला व तुझ्या क्रशर मालकाला गोळ्या घालतो” अशी जिवे मारण्याची धमकी दिली होती. याप्रकरणी फिर्यादीवरून भिगवण पोलीस स्टेशन येथे गुन्हा रजि. नंबर १९८/२०२६, भारतीय न्याय संहिता (BNS) २०२३ चे कलम ३५१(२), ३५२ व भारतीय शस्त्र अधिनियम कलम ३(२५) प्रमाणे गुन्हा दाखल करण्यात आला होता.
पोलिसांची कारवाई वअटक:
गुन्ह्याचे गांभीर्य ओळखून भिगवण पोलीस स्टेशनचे प्रभारी अधिकारी सहाय्यक पोलीस निरीक्षक सोमनाथ शेंडगे यांनी तात्काळ तपास पथक तयार करून आरोपीच्या शोधासाठी रवाना केले. तपासादरम्यान दिनांक १०/०८/२०२६ रोजी आरोपी सौरभ पवार याला ताब्यात घेऊन विचारपूस केली असता त्याने गुन्ह्याची कबुली दिली. त्याच्या ताब्यातून:अग्निशस्त्र: १ गावठी पिस्तूल काडतूस: १ जिवंत काडतूस वाहन: स्कॉर्पिओ गाडी (क्र. MH 12 EM 9488) एकूण किंमत: रु. ५,४०,२००/- जप्त करण्यात आले आहेत. आरोपीस १०/०८/२०२६ रोजी रात्री २०:०४ वाजता अटक करण्यात आली असून न्यायालयाने आरोपीला दिनांक १३/०८/२०२६ पर्यंत पोलीस कोठडी मंजूर केली आहे.
सदरची धडक कामगिरी पुणे ग्रामीणचे पोलीस अधीक्षक संदीप सिंह गिल, अपर पोलीस अधीक्षक (बारामती) गणेश बिरादार, उपविभागीय पोलीस अधिकारी चैतन्य कदम, आणि स्थानिक गुन्हे शाखेचे वरिष्ठ पोलीस निरीक्षक प्रमोद क्षीरसागर यांच्या मार्गदर्शनाखाली पार पडली.
सहाय्यक पोलीस निरीक्षक सोमनाथ शेंडगे यांनी नेमलेल्या पथकात पोलीस उपनिरीक्षक अमित पाटील, विठ्ठल वारगड, पोलीस अंमलदार महेश उगले, सचिन पवार, आणि रणजित मुळीक यांनी ही कारवाई केली. गुन्ह्याचा पुढील तपास स.पो.नि. सोमनाथ शेंडगे करत आहेत.
