भिगवण वार्ताहर .दि.८
भिगवण गावच्या ग्रामीण रुग्णालयात पहिल्यांदाच महिला प्रसूती शस्त्रक्रिया म्हणजेच सीझर करण्यात यश आल्याची माहिती ग्रामीण रुग्णालयाचे वैदकीय अधिकारी डॉ.सचिन विभूते यांनी दिली.सीझर नंतर बाळ आणि महिला दोघांची प्रकृती ठणठणीत असून सीझर शस्त्रक्रिया वेळी खासगी दवाखान्यातील कट प्रक्टिस मुळे होणारी सर्वसामान्य रुग्णांची आर्थिक लुट थांबण्यास मदत होणार असल्याची शक्यता निर्माण झाली आहे.
ग्रामीण रुग्णालयात असणाऱ्या अपुऱ्या सुविधा आणि महिला सुलभ प्रसूतीसाठी तसेच सीझर प्रसूतीसाठी पायाभूत सुविधा मिळाव्या यासाठी शिवतेज ग्रुप आणि आखिल भारतीय मराठा महासंघ यांच्या वतीने जन आंदोलन करीत मोर्चाचे आयोजन करण्यात आले होते.याच आंदोलनाची दखल घेत जिल्हा आरोग्य अधीक्षक डॉ.नागनाथ एमपले यांनी रुग्णांना चांगल्या आरोग्य सुविधा मिळाव्यात अश्या सूचना कर्मचारी आणि अधिकारी यांना केल्या होत्या.याची दखल घेत येथील वैदकीय अधीक्षक डॉ.सचिन विभूते यांनी रुग्णांना चांगल्या सुविधा मिळतील अशी कार्यपद्धती अवलंबित कामकाज सुरु केले. बुधवारी प्रसूती साठी दाखल झालेल्या महिलेची नैसर्गिकरीत्या प्रसूती होणार नसून सीझर करावे लागेल याची खात्री झाल्याने तातडीने इंदापूरचे वैदकीय अधीक्षक डॉ.सिद्धार्थ नामपल्ले ,स्त्रीरोगतज्ञ डॉ.सूर्या दिवेकर ,भूलतज्ञ डॉ.युवराज हाके बालरोगतज्ञ डॉ.विनायक देशपांडे ,भिगवण परिसरातील प्रसिद्ध स्त्रीरोगतज्ञ डॉ.अमोल खानावरे यांना पाचारण करीत सीझर शस्त्रक्रिया पार पाडली.शस्त्रक्रिया पार पडताच बालरोगतज्ञ डॉ.देशपांडे यांनी बाळाची तपासणी करून वैदकीय प्रक्रिया पूर्ण केली.सीझर नंतर बाळ आणि आई यांची प्रकृती ठीक असल्याने टीमने आनंद व्यक्त केला. या सीझर साठी राष्ट्रवादी कांग्रेस च्या तालुका उपाध्यक्षा सीमा काळंगे यांनी मोलाची मदत केली.तसेच दिवसभर या ठिकाणी थांबून बाळाची आणि त्याच्या आईच्या तब्बेतीची काळजी घेतली.
यावेळी बोलताना ग्रामीण रुग्णालयाचे अधीक्षक डॉ.सचिन विभूते यांनी सीझर साठी उपलब्ध झालेल्या सर्व डॉ.टीमचे तसेच वैदकीय कर्मचारी यांचे आभार व्यक्त केले .तसेच परिसरातील नागरिकांना आणि विशेषता महिला रुग्णांना ग्रामीण रुग्णालयात बाळंतपण तसेच सीझर शस्त्रक्रिया पार पडत असून याचा लाभ घेण्याचे आवाहन केले.
