भिगवण वार्ताहर : दि.८
शालेय परीक्षेत अपयश आलेल्या एका मुलीने नैराश्यातून खचून जाऊन घर सोडून निघून जाण्याचा प्रयत्न केला. परंतु, सदरचा प्रयत्न भिगवण पोलिसांच्या समय सुचकतेमुळे तिचा हा प्रयत्न फसला. घर सोडून निघून जाणारी मुलगी पुन्हा घरच्यांच्या स्वाधीन करण्यात पोलिसांना यश आले.
या बाबतची हकीकत अशी, करमाळा तालुक्यातील एक मुलगी डिप्लोमा या शाखेत शिक्षण घेत होती. या शाखेचा नुकतंच निकाल लागला. त्यामध्ये ती अनुत्तीर्ण झाल्याने तिने नैराश्यातून घर सोडून निघून जाण्याचा निर्णय घेतला. ति करमाळा येथून थेट भूम- स्वारगेट एसटीमध्ये निघाली. ही घटना जवळच्या नातलगांना कळताच त्यांनी मुलीचा शोध घेण्यात सुरुवात केली. मुलगी स्वारगेटकडे एसटीने मार्गस्थ झाल्याची माहिती कळताच मुलीच्या नातलगांनी या मार्गावरील सर्व एसटी डेपो व सर्व पोलीस स्टेशनशी संपर्क साधून सदर मुलीचे फोटो व नाव व्हाट्सअपवर व्हायरल केले. दरम्यान, या मुलीचे फोटो इंदापूर डेपो मॅनेजर यांनी सर्व बस स्थानकाच्या डेपो मॅनेजर सर्व बसेच्या चालक, वाहक व बस थांबत असलेल्या हॉटेल चालकांना पाठविले. त्याच वेळी भिगवण पोलीसही त्या मुलीच्या शोधात होते.
भिगवण पोलिसांकडून मुलीचे समुपदेशन :
ही मुलगी ज्या बसमध्ये बसली ती बस पुण्याचे दिशेनी गेल्याचे समजताच भिगवणचे पोलिस अधिकारी दिलीप पवार यांनी एक पथक तयार करून परिवहन विभागाचे अधिकृत मान्यता असलेले हॉटेल उदयचे मालक समीर मुलाणी यांच्या संपर्क करून त्यांना मुलीची माहिती दिली. मुलाणी यांनी येणाऱ्या प्रत्येक एसटी बसवर बारीक नजर ठेवून सर्व एसटींची कसून चौकशी केली असता घर सोडून जाणारी मुलगी नजरेस पडली. त्यांनी ती बस थांबवून ठेवली. काही वेळानंतर भिगवण पोलिसांनी त्या मुलीस ताब्यात घेत तिच्या कुटुंबियांना माहिती दिली. कुटुंबीय येईपर्यंत सपोनि .दिलीप पवार व महिला पोलिस हवालदार दीपाली खेत्रे यांनी या मुलीचे समुपदेशन करत मत परिवर्तन केले. तसेच संबंधित मुलीला सुखरूप तिच्या पालकांच्या स्वाधीन केले.
