भिगवण वार्ताहर .दि. ७
भिगवण येथील मुख्य बाजार पेठेतील सराफी दुकान चोरट्यांनी मध्यरात्रीच्या सुमारास फोडण्याचा प्रयत्न केला.मात्र दुकानात असणारा सायरन वाजल्यामुळे चोरट्यांनी पळ काढला .या संपूर्ण प्रकाराचे सी.सी टी व्ही मध्ये चित्रण झाले असून भिगवण पोलिसांनी तातडीने घटनास्थळी भेट देत चोरट्यांचा शोध सुरु केला.
याबाबत मिळालेल्या माहितीनुसार भिगवण बाजार पेठेतील श्रीकृष्ण ज्वेलर्स या सराफी दुकानात हा प्रकार घडला.मध्यरात्री २ च्या सुमारास चारचाकी वाहनातून आलेल्या ४ ते ५ अज्ञात चोरांनी कटावणी च्या सहायाने दुकानाचे शटर उघडले .मात्र शटर उघडताच दुकानाच्या सुरक्षेसाठी बसविण्यात आलेली सायरन चालू झाल्यामुळे चोरट्यांनी येथून पळ काढला.तर काही वेळानी याच ठिकाणी येवून परत चोरी करण्याचा प्रयत्न केला.मात्र दुकानाच्या आत असणारी जाळी तोडण्याचा प्रयत्न करत असताना नागरिकांना याची चाहूल लागल्यामुळे येथून पळ काढण्यात समाधान मानले.सायरनचा आवाज जवळपास २० मिनिट येवूनही कोणीही या ठिकाणी न आल्यामुळे परत येण्याचे धाडस चोरट्यांनी केले असल्याचे दुसऱ्या इमारतीवर असणाऱ्या सी.सी.टी.व्ही चित्रणातून दिसून आले.काही वेळानी या ठिकाणी राहणाऱ्या नागरिकांना याची माहिती मिळाल्यामुळे नागरिकांनी गर्दी केल्याचे पहावयास मिळाले.याबाबत भिगवण पोलीस ठाण्यात माहिती मिळताच पोलिसांचे पथक घटनास्थळी भेट देण्यासाठी आले होते.
चौकट…..आजकाल सोन्याचे भाव गगनाला भिगले असून चोरट्यांनी सराफी दुकाने फोडण्याचे टार्गेट ठेवल्याचे दिसून येत आहे.तर चारचाकी वाहन दुकानाच्या दरवाजात लावून चोरी करण्यामागे तिजोरी फोडण्यासाठी वापरण्यात येणारी गॅसकटर यंत्रणा वापरण्याचा हेतू असल्याचे दिसून येत आहे.त्यामुळे पोलीस तसेच व्यावसायिकांनी या बाबत गंभीरता पूर्वक उपाययोजना करण्याची करण्याची आवश्यकता असल्याचे सराफ संघटना सदस्य सुनील उदावंत यांनी सांगितले.
