भिगवण वार्ताहर.दि.२५
लस घेवूनही आपणाला कोरोनाच्या आजाराचा संसर्ग झाल्याचा संशय आणि उपचारासाठी बेड मिळणार नाही या भीती पोटी एका ज्येष्ठ नागरिकाने गळफास लावून घेत आपले जीवन संपविल्याची घटना भिगवण येथे घडली.
याबाबत भिगवण पोलिसांनी दिलेल्या माहिती नुसार प्रकाश विष्णुपंत भगत वय ६५ असे गळफास लावून आत्महत्या करणाऱ्या इसमाचे नाव आहे. भगत यांनी ८ दिवसापूर्वी कोरोना लस घेतली होती .लस घेतल्या पासून त्यांची तब्बेत ठीक नव्हती . सर्दी खोकला आणि अंगदुखी सारखा किरकोळ आजार होता. चार दिवस होवूनही आराम मिळत नसल्यामुळे घरातील इतर सदस्यांनी त्यांना कोरोना चाचणी घेण्यासाठी सांगितले.मात्र आपली कोरोना चाचणी पोझीटिव्ह आला तर आपल्याला उपचार मिळतील का ,बेड मिळेल का या काळजीने २४ एप्रिल रोजी रात्री जेवण झाल्यानंतर सर्व सदस्य झोपले असता त्यांनी स्वयपाकघरात जात पंख्याला लटकून आपला जीव दिला.लस घेतली असताना आपणाला कोरोना कसा झाला याच विवंचनेतून त्यांनी हे टोकाचे पावूल उचलले असल्याची शक्यता वर्तविण्यात येत आहे.
याबाबत दतात्रय प्रकाश भगत यांनी भिगवण पोलीस ठाण्यात खबर दिली असून भिगवण पोलीस पुढील तपास करीत आहेत .याबाबत बोलताना भिगवण पोलीस ठाण्याचे प्रभारी अधिकारी जीवन माने आवाहन करताना कोरोना हा आजार बरा होणारा आजार असून तपासणी पोझीटिव्ह आली म्हणून घाबरून जावून टोकाचा विचार न करता उपचार घ्यावेत असे सांगितले.
