भिगवण वार्ताहर .दि .२०
बारामती भिगवण रस्त्यावर शेटफळगढे गावच्या हद्दीत शेतमालाची वाहतूक करणाऱ्या मालगाडीखाली सापडून सुरक्षा रक्षकाचा चेंगरून मृत्यू झाल्याची घटना शनिवारी रात्रीच्या सुमारास घडली.
याबाबत मिळालेल्या माहिती नुसार संतोष मारुती शिंदे वय ४७ रा.सणसर असे अपघातात मृत्यू झालेल्या सुरक्षा रक्षकाचे नाव आहे.बारामती भिगवण रस्त्यावर शेटफळगढे अग्रो कारखान्याच्या उस वाहतूक करणाऱ्या वाहनासाठी रहदारी नियंत्रण करण्याचे काम शिंदे करत होते . शनिवारी काम करीत असताना बारामती बाजूने भिगवण कडे शेतीमाल मका घेवून येणाऱ्या ट्रकच्या खाली त्यांचा चेंगरून मृत्यू झाला.अपघात होताच मालवाहतूक करणाऱ्या चालकाने अपघात स्थळावरून पळ काढला .
याबाबत भिगवण पोलिसांनी अपघातातील ट्रक नंबर एम .एच .४२ बी ८२९६ या वाहनावरील अज्ञात ड्रायव्हर विरोधात हयगयीने अविचाराने रहदारीचे नियमाचे उलंघन करीत अपघात करून मृत्यूस कारणीभूत झाल्याचा गुन्हा नोंद केला आहे.घटनास्थळी भेट दिली असता अपघात अतिशय गंभीर झाल्याचे दिसून येत होते.यात सुरक्षा रक्षकाच्या देहाचे अक्षरशा चेंदामेंदा होवून दोन तुकडे झाल्याचे दिसून आले.याबाबत मारुती बजरंग गाडेकर यांनी फिर्याद दिली असून भिगवण पोलीस ठाण्याचे प्रभारी अधिकारी दिलीप पवार यांच्या मार्गदर्शनाखाली पोलीस हवालदार महेश माने अपघाताचा तपास करीत आहेत .
अपघात घडल्यामुळे बारामती आणि भिगवण रोडवर दोन्ही बाजूला वाहनांची मोठी रांग लागल्याचे भिगवण पोलिसांना समजताच भिगवण पोलीस ठाण्याचे पोलीस उपनिरीक्षक विनायक दडसपाटील ,उपनिरीक्षक रुपेश कदम ,पोलीस हवालदार महेश माने ,पोलीस हवालदार निंबाळकर यांनी अपघात स्थळी धाव घेत वाहतूक सुरळीत करण्याचे काम केले .तसेच कारखान्याची क्रेन उपलब्ध करून अपघाती वाहणाखाली अडकलेला मृतदेह बाहेर काढून शवविच्छेदन करण्यासाठी पाठवून दिला .भिगवण पोलिसांनी दाखविलेलया तत्परतेचे वाहन धारकांनी आभार मानले .
