भिगवण वार्ताहर.दि.८
वडिलोपार्जित जागेच्या वहिवाटीवरून झालेल्या वादात लोखंडी गज आणि लाकडी दांड्याने मारहाण करीत एका वृद्धाचा जीव घेण्याचा प्रकार निरगुडे येथे घडला.याबाबत भिगवण पोलिसांनी गुन्ह्याची नोंद करीत ३ आरोपींच्या मुसक्या तातडीने आवळल्या.
भिगवण पोलीस ठाण्याच्या हद्दीतील हा खळबळजनक प्रकार असून याबाबत प्रभारी पोलीस अधिकारी दिलीप पवार यांनी दिली.मारुती गणपत लकडे वय.८५ असे खून झालेल्या वृद्धाचे नाव आहे.यात त्यांचा मुलगा शिवाजी लकडे ,नातू बाळू शिवाजी लकडे आणि वाल्मिक शिवाजी लकडे हे गंभीर जखमी झाले आहेत.याप्रकरणी भिगवण पोलिसांत आरोपी नारायण ज्ञानदेव लकडे ,दत्तू ज्ञानदेव लकडे ,ज्ञानदेव कृष्णा लकडे ,अमर दत्तू लकडे ,तम्नय नारायण लकडे ,शुभम नारायण लकडे ,पारूबाई ज्ञानदेव लकडे सर्वजण रा.निरगुडे (लकडेवस्ती ) या ७ जनाविरोधात खुनासह जीवे मारण्याचा प्रयत्न करण्याचा गुन्हा नोंद करण्यात आला आहे. वडिलोपार्जित जमिनीच्या वादावरून गुरुवारी संध्याकाळी साडेपाच वाजण्याच्या सुमारास मारुती मंदिराजवळ ७ जणांनी एकत्र येत मयत वृद्ध आणि त्याच्या मुलावर आणि नातवावर हा खुनी हल्ला चढविला.यात मारुती लकडे यांचा उपचारादरम्यान मृत्यू झाला तर इतर गंभीर जखमीवर उपचार सुरु करण्यात आले आहेत.
पुणे ग्रामीण पोलीस अधीक्षक डॉ.अभीनव देशमुख ,अप्पर पोलीस अधीक्षक मिलिंद मोहिते ,विभागीय पोलीस अधिकारी गणेश इंगळे यांच्या मार्गदर्शनाखाली प्रभारी पोलीस अधिकारी दिलीप पवार यांनी भिगवण पोलीस तसेच स्थानिक गुन्हे अन्वेषण यांची तीन पथके नेमून यातील नारायण ,दत्तू आणि अमर या तिघांना अटक केली असून इतर आरोपींचा शोध सुरु केला आहे.
