पुणे सोलापूर महामार्गाच्या पूर्व पश्चिम बाजूला अतिक्रमण झालेले असताना कारवाई फक्त चार दुकानावर का ? कारवाई होत असलेल्या ठिकाणच्या नागरिकांचा सवाल
कारवाई करत असताना कोणावरही अन्याय केला जाणार नाही .सदर ठिकाणच्या तक्रारी वरिष्ठ कार्यालयाला मिळाल्याने कारवाई होत असून हद्दीतील सर्व अतिक्रमण काढण्याची प्रक्रिया सुरू केली असल्याची हायवे प्रशासनाचे कायदेशीर वकील सरवदे यांची माहिती.
भिगवण वार्ताहर .दि.१२
पुणे सोलापूर महामार्गाच्या सर्विस रस्त्यावर असणारे अतिक्रमण हटविण्याची कारवाईला आज सुरवात करण्यात आली.मात्र या कारवाईला अतिक्रमण करणार्यांनी विरोध करीत कारवाई सर्व ठिकाणी झाल्यास आम्ही स्वताहून आमची दुकाने काढू अशी मागणी केली.
पुणे सोलापूर महामार्गाच्या पूर्व आणि पश्चिम बाजूला अतिक्रमणाचा वेढा पडला आहे.तर अगदी मुख्य हायवे वर सुद्धा भाजी तसेच फळ विक्रेत्यांनी अतिक्रमण केलेले आहे.त्यामुळे अपघाताची शक्यता असून जीवित हानी होण्याची शक्यता नाकारता येत नाही.त्यामुळे हायवे प्रशासनाने महाराष्ट्र सुरक्षा बलाच्या माध्यमातून या अतिक्रमणावर कारवाई करण्यास सुरवात केली आहे.हायवे प्रशासनाचे कायदेशीर सल्लागार अॅड .सरवदे यांच्या मार्गदर्शनाखाली हि कारवाई सुरवात करण्यात आली असून या कारवाईला अतिक्रमण करणाऱ्या दुकानदारांनी विरोध केला .महामार्गाच्या दोनही बाजूला अतिक्रमण असताना फक्त आमच्याच दुकानावर बुलडोझर का अशी विचारणा यावेळी या दुकानादारणी केली.तर पावसाळ्याचे दिवस असल्यामुळे काही सवलत दिल्यास आम्ही आमची सोय करू असी विनंती करीत कोरोनामुळे आधीच अर्धमेला झालेल्या दुकानदाराला अजून मारू नका अशी आर्जव केली.त्यामुळे अतिक्रमण करणारे व्यावसायिक आणि कारवाई साठी आलेल्या अधिकारी यांना भिगवण पोलीस ठाण्यात बोलावण्यात आले होते.अतिक्रमण करणार्यांनी पोलीस अधिकारी जीवन माने यांना कारवाई काही दिवसासाठी पुढे ढकलण्याची विनंती करणारे पत्र दिले .मात्र हायवे प्रशासन कारवाई करण्यावर ठाम असल्यामुळे वातावरण तापले असल्याचे दिसून आले.
पुणे सोलापूर महामार्गावरील अतिक्रमण दिवसेंदिवस वाढत असून यावर लक्ष ठेवणारी यंत्रणा कारवाई करत नसल्याचे दिसून येत आहे.त्यामुळे अतिक्रमण करण्याची मानसिकता निर्माण होत असून नंतर करण्यात येत असलेल्या कारवाईला विरोध होत असल्याचे दिसून येत आहे.
