गंभीर रुग्णाच्या नातेवाईकांना करावी लागते इंजेक्शन मिळविण्यासाठी धावाधाव …
कोवीड सेंटरमध्ये कोणाचाच कोणाला मेळ लागत नसल्याचे दिसत आहे वास्तव..
भिगवण वार्ताहर .दि.२६
भिगवण कोविड सेंटर मध्ये आवश्यकता असणाऱ्या रुग्णांना रेमडीसिवीर इंजेक्शन आणि फेबी फ्ल्यू गोळ्या मिळत नसल्यामुळे १५ ऑक्सिजन बेडची सुविधा कशासाठी देण्यात आली असा सवाल येथील रुग्ण करीत आहेत.तर भिगवण येथील कोविड सेंटरला फिजिशन डॉक्टरची नियुक्तीच झाली नसल्याची माहिती कोविड सेंटर येथील डॉ.गणेश पवार यांनी दिली .
भिगवण येथे कोविड सेंटर मध्ये १०० च्या वर बिगर लक्षणी रुग्ण उपचार घेत आहेत .तर आठ दिवसापूर्वी राज्यमंत्री दत्तात्रय भरणे यांच्या उपस्थितीत १० ऑक्सिजन बेडची उपलब्धता करण्यात आली. त्यात वाढ करीत बेडची संख्या १५ पर्यंत नेण्यात आली.मात्र आठ दिवस होवूनही या ऑक्सिजन बेड मध्ये रुग्णांना आवश्यक असणाऱ्या सुविधा देण्यात आलेल्या नाहीत ..या ठिकाणी नियुक्ती असणाऱ्या चार वैदकीय अधिकाऱ्या पैकी २ जणच सेवा देत आहेत.तर या कोविड सेंटर मध्ये फिजीशन डॉक्टर नियुक्ती झाली नसल्यामुळे अति गंभीर रुग्णांना उपचार करताना अडचणींचा सामना करावा लागत असल्याची माहिती येथील अधिकार्यांनी दिली.तर या कोविड सेंटर मध्ये आवश्यक असणारी रेमडी सिवीर इंजेक्शन तसेच फेबीफ्ल्यू गोळ्या उपलब्ध करून देण्यात आलेल्या नाहीत.त्यामुळे गंभीर अवस्थेतील रुग्णाच्या जीविताला धोका निर्माण होत आहे. रेमडी सिवीर इंजेक्शन बाबत तालुका आरोग्य सुनील गावडे यांना विचारणा केली असता त्यांनी रेमडी सिवीर इंजेक्शन ची मागणी उपजिल्हा आरोग्य अधिकारी चंदनशिवे यांच्या आदेशाने जात असल्याचे सांगितले.
याबाबत बारामती विभागीय अधिकारी दादासाहेब कांबळे यांना संपर्क साधला असता इंदापूर उपजिल्हा आरोग्य केंद्रासाठी इंजेक्शन पुरवठा करण्यात आला असल्याची माहिती दिली.तर भिगवणला याच ठिकाणाहून इंजेक्शन देण्यात येणार असल्याचे सांगितले.
आवश्यक डॉक्टर आणि सुविधांचा वानवा असताना आणि इंजेक्शन आणि गोळ्यांचा पुरवठा नियमित होत नसताना ऑक्सिजन बेडची सुविधा तातडीने करण्याची गरज होती का ?असा सवाल या माध्यमातून निर्माण होत आहे.
याबाबत अनेक वेळा प्रयत्न करूनही उपजिल्हा आरोग्य अधिकारी डॉ. चंदनशिवे यांच्याशी संपर्क होवू शकला नाही
याबाबत राज्यमंत्री दत्तात्रय भरणे यांचे स्वीय सहाय्यक अनिकेत जाधव यांच्याशी संपर्क साधला असता त्यांनी मंगळवार पासून इंजेक्शन उपलब्ध होणार असल्याचे सांगितले.तसेच याठिकाणी लागणाऱ्या सर्व सुविधा तातडीने पुरविण्यात येणार असल्याचे सांगितले.
